Лазо Крумов

Движете го глувчето во било кој правец или вртете со вашиот мобилен телефон за целосно да ја погледнете панорамата од пчеларникот.

Роден сум во с. Горни Подлог – Кочани, во 1994 г, и сум млад пчелар кој поради работните обврски често престојувам и во Скопје.

Со пчеларство почнав да се занимавам од пред 4 години. Начинот на кој започнав да влегувам во светот на пчелите е интересен. Во еден разговор со мој близок пријател,  ми пренесе информација дека постои тримесечна обука за млади кои би сакале да се стекнат со основни знаења за пчелите. До тој момент немав никакво предзнаење за пчеларството и ми беше предизвик да научам да пчеларам, но и како да ги применувам биотехничките методи, со кои би избегнал користење на штетни хемиски средства при одгледување на пчелите. На обуката како млад пчелар почетник ми беа доделени 3 пчелни семејства. Од тогаш па сè до денес, ја продолжив дружбата со пчелите.

Моментално имаме 50 пчелни семејства, со план за проширување. Во текот на пчеларењето сменив неколку пчеларници на различни надморски височини, за да денес стационарниот пчеларник ми се наоѓа во с. Нивичани на околу 700 м надморска височина. Медот којшто се собира во тој регион е ливадско-планински. За нормално функционирање во пчеларникот, имам огромна помош од мојот татко и чичко. Нашата цел е пчеларството да прерасне во сериозна семејна дејност.

Од моето скромно знаење во пчеларството, научив  интересни работи за пчелите и нивното огромно значење на глобално ниво. Голема предност имаат сите кои се занимаваат со пчеларство, дали како хоби или професионално, бидејќи низ самиот процес на производство на мед или други пчелни производи сѐ повеќе и повеќе се доближуваме до природата, а со тоа и начинот на размислување за неа – колку е корисна и на кој начин треба да се грижиме за неа. Доколку ние даваме за неа, таа може дупло да ни врати директно на нас и индиректно на секој околу нас. Затоа активно членувам во здружението „Меден Исток“, во кое се залагаме да добиваме мед на одржлив начин, што е и нашето мото: ние за пчелите, медено за сите!.

Според мене од клучна важност е на било кој начин, системски, од најмала возраст да се запознаваат и информираат сите околу  нас, за огромната важност на пчелите, нивните производи и  можеби најважно од сè, етично однесување спрема нив и максимална заложба за зачувување на пчелите.

1011