Ане Василков

Движете ја фотографијата во било кој правец за целосно да ја погледнете панорамата од пчеларникот.

Роден сум во 1995 г. и живеам во Кочани. За прв пат започнав да се занимавам со одгледување на пчели со уловување на моето прво пчелно семејство во 2015 г.

За обуката за пчеларство организирана од Програмата за зачувување на природата (ПЗП), дознав од мој близок пријател кој веќе се занимава со одгледување на пчели. Посетата на обуката со која се стекнав со нови знаења, а особено за одржливите практики во пчеларството, ми помогна да го зголемам бројот на пчелните семејства и да го проширам пчеларникот. Преку Програмата поминав и напредна обука за млади пчелари, со која се обучив освен мед од мојот пчеларник, исто така и да произведувам други пчелни производи, како што се: прополис, перга, матичен млеч и друго.

Во моментов имам еден пчеларник што се наоѓа во с. Бања и на кој произведувам ливадски мед на одржлив начин со примена на биотехничките методи.

Пчелите се инсекти чие значење за човекот и природата е навистина големо, почнувајќи од медот и восокот кој тие го даваат, па сè до опрашувањето што го вршат кај растенијата. Пчелите се зависни од природата, а и природата од нив, што значи ако пчелите исчезнат од површината на Земјата тогаш би исчезнало и човештвото. Затоа треба сите да се трудиме да ги зачуваме и да не им наштетуваме.