Јордан Варадинов

Движете го глувчето во било кој правец или вртете со вашиот мобилен телефон за целосно да ја погледнете панорамата од пчеларникот.

Јас сум млад пчелар, роден во Кочани, 1996 г. Со пчеларство почнав да се занимавам рекреативно од 2015та г., откако се приклучив на обуката на млади пчелари од Брегалничкиот Регион.

За оваа обука организирана од Програмата за зачувување на природата (ПЗП) дознав од медиумите и по консултација со пчелари од овој регион, кои топло ми ја препорачаа, се пријавив да ја посетувам. Таму се стекнав со основните познавања на пчеларството и уште повеќе се разви мојата љубов за одгледување на пчелни семејства, а особено кога многу повеќе осознав за одржливото пчеларење.

Денес имам околу 30 пчелни семејства и роеви кои ги одгледувам во два пчеларника: еден на Осоговските планини и другиот во Кочанскиот регион, поточно во с. Тркање. Во зависност од годината и пашата, медот е ливадски или мешан со планински. Кога имам повеќе обврски околу моите студии, во одгледувањето или за одредени консултации ми помагаат мојата девојка или повозрасните и поискусни пчелари од овој регион од здружението „Меден Исток“, каде што сум и јас член.

Обуката ми помогна да ги осознаам основните бенефити и важноста на пчелите во општеството. Сега секојдневно се учам и надоградувам за тоа колку се значајни пчелите за зачувување на животната средина, колку се здрави и ефикасни – не само медот, туку сите нејзини производи и дека пчелата е една основна алка за зачувување на природата. Освен тоа, одгледувањето на пчелите ми претставува одмор од секојдневниот брз живот со многу обврски.